कधी डोळे मिटून चालून पहा

कधी डोळे मिटून चालून पहा
मान्य आहे तुम्ही थबकून चालाल
नको तिथे वळण घ्याल
वळणावरती सरळ जाल
नकळत कुणाला धक्का द्याल
कुणाचे खडे बोल ऐकाल
पण माफी मागून चालत राहाल
कुठे दगडावरती बोट ठेचाळाल
या मूर्खपणाला शिव्या द्याल
तरीपण कधी डोळे मिटून चालून पहा
मग तुम्ही कानांच्या आधीन व्हाल
सभोवतालच जग ऐकाल
गर्दी मध्ये गाड्यांचे आवाज
लांबून जवळ जवळून लांब
शेजारच्या जोडप्याचं गुलुगुलू ऐकाल
नळावरचं भांडण पण ऐकाल
कुणा छोटुल्याचा हट्ट ऐकाल
देवापुढले डीजे ऐकाल
आणि चौकात पोलिसाची
शिट्टी पण ऐकाल...
"ए हिरो, सिग्नल दिसत न्हाय?"
मग डोळे उघडून चालू लागाल
त्यापेक्षा कधी रानात डोळे मिटून पहा
इथे शुष्क पानांचा चरचराट ऐकाल
फळाफुलांचे गंध घ्याल
कधी तुम्ही मोगऱ्याच्या हद्दीत
तर कधी तुम्ही चाफ्याच्या सावलीत
पक्षांची किलबिल ऐकाल
ओढ्याची खळखळ ऐकाल
मनातल्या हाका ऐकाल
जागेपणीच स्वप्न पहाल
पण नकळत बाभूळीवर
पाय पण द्याल
अंधारले गुंते पण सोडवाल
अन बंद डोळ्यांनी जग पहाल
म्हणून म्हंटलं
कधी डोळे मिटून चालून 'पहा' !!!

                               ~ अचलेय
                               ( १८-एप्रिल-२०१८ )

कधी डोळे मिटून चालून पहा